上回咪講到我生日唱K飲大左上左AX屋企嘅，到底會發生咩事呢？
其實因為AX屋企同Neway 5分鐘路程，嗰時又未天光，我又飲大左，AX就話，黑麻麻走咩鬼吖一陣比人捉左妳，妳上嚟我度坐一陣啦。咁我就跟左佢返屋企。
行去AX屋企需時5分鐘，經過上次拖手事件，我就幻想今次會唔會又案件重演呢？但。。。無囉。AX 仲要好cool咁行喺我前面，得閒先拎轉頭望下我。上到佢屋企，我一頭倒在梳化上，佢倒左杯水比我，又拎左條毛巾被比我，然後就入左房無出過嚟。
我合著左一陣，一開眼已經天光，同時我都酒醒左。嗰下我望住呢間屋嘅環境，心諗，我喺度做緊咩！飲大左中上人地屋企攤喺人梳化，好難睇呀！於是我摺好張被洗返個杯，就離開左佢屋企。上到車仲send SMS 同佢講聲，唔好意思打搞哂！佢無回覆我，應該瞓左。
點知第二日，有個朋友打來質問我尋晚搞咩走上AX屋企。個朋友係個比我地年長十年嘅基督徒，原本我地約左佢同幾個朋友第二日上AX度開午間茶會小組，但 AX口快快就爆左我尋晚上左佢度天光先走，驚我會攰，咁頻撲。基督徒朋友就覺得好大件事，認為我地唔應該咁隨便，同AX傾左一大輪，之後又打比我"訓 話"。
佢話，我令到AX 好為難，問我點解要咁任性飲醉酒。AX為左保護我，刻意滴酒不沾去保持清醒，因為佢估到我又會飲醉，佢要照顧我。嗰下我真係好感動架，呢個世界竟然仲有呢 種男人，唔係趁個女仔飲醉乘人之危，或乘機借醉行兇，我真係覺得自己無鍾意錯佢！但點知之後朋友講嘅嚟令我跌入谷底。。。
佢話，叫我預左從此之後AX會疏遠我，因為佢同AX講，如果唔想大家誤會，就退後一步，將個圈畫大啲，而AX都話好。我聽到好唔開心，忍唔住喊左出嚟。
朋友追問我點解喊。我無講到，嗰刻我唔想同任何人剖白我對AX嘅感情。我只係覺得，如果因為咁令我地連三年嘅友情都無埋，我會好傷心，好難過。。。
AX下晝打比我，聲線正常，問我，瞓醒啦？我就當然扮無嘢啦。佢話午間茶會改左夜晚飯聚，叫我都一齊嚟。我心諗，AX都無避開我啦，咁如果我避開佢，咪更顯示出我有嘢囉？所以我應承左。
嗰晚AX親自下廚，我第一次試到佢手勢！真係個住家好男人呀！佢又加分了！
 |
| 就係呢碟咖哩雞令AX加分了~!!! ^^ |
其實好快AX已經無再避開我，我地又好似以前咁日日吹水。但點解成日有啲人無啦啦走出嚟妨礙我嘅決心呢？
上次我咪提過同個女仔朋友講擇偶條件嘅，就叫佢做mm啦。mm曾經同我係好好朋友架，佢係第一個知道我暗戀AX嘅。佢同AX都係好朋友，佢話幫我試探AX口風添！於是我就成日同佢分享少女心事。
有一日我同AX,mm前後腳飛倫敦，我地約埋成班同事出去玩，但AX一直無咩出聲，行行下仲話唔舒服返酒店先。我個心隨住AX走左都飛走埋，食晚飯前我仲藉口唔舒服走先。其實我去左藥房買藥比AX。
我買左一包喉糖同一盒傷風藥，打算拎去比AX。但又超級R底，電話都唔敢打比佢。終於鼓起勇氣行到佢房門口，聽到佢睇緊電視未瞓喎，但又唔知點做好。我真 係好似拍戲嗰啲傻人喺度諗開場白呀。但最後我都無勇氣面對佢，我將袋藥掛喺佢房門，然後，咯咯咯敲左三下，就沒命地狂奔逃跑返房。我個心跳得好快呀！提醒 大家老啲都唔好玩暗戀真係會心臟病發。
冷靜左啲我就打比mm，話佢知我又做左呢啲瘀嘢了，點知mm無笑，好嚴肅咁同我講:"其實妳唔好再做呢啲嘢啦。AX同我講，覺得好煩，唔鍾意。"
我呆左，覺得好hurt，咁我做咁多嘢都係多餘啦？AX會茶餘飯後攞我嚟當笑話講嗎？我忍住眼淚同mm收線，然後先大喊一餐。
AX全晚都無搵我，都唔知佢收到啲藥有咩反應，我係咪做錯左呢？呢啲暗戀情懷係咪應該好好收藏喺心底？至少可以保留住我地建立左三年嘅友情？
點知第二朝一早，AX就打比我，聲線好精神咁。我問，好返啦咩？佢話，無咩事啦，食左藥嘛。佢仲話，下次唔好買嗰隻喉糖，溶溶地啲糖紙痴住哂好核突。
AX根本唔似mm所講咁反感喎！反而我覺得佢幾開心我為佢做嘅呢件事。到底AX有無同mm講嗰番說話呢？至今又係個謎囉。。。
 | |
| 倫敦常常見到嘅「警馬」,陪住我地享受英倫的午後陽光。 |
沒有留言:
張貼留言