好啦好啦！到求婚事件啦！其實相比起其他人嘅求婚片段，我嘅經歷真係一啲都唔浪漫架！花？無！燭光晚餐？無！連戒指都係後補架咋！坦白講我啲朋友都話，吓！戒指都無隻就應承嫁佢？哈哈我都係懵盛盛落搭架咋！
拍左拖得嗰10日，我地喺whatsapp 傾計，傾傾下就講到結婚呢個話題。佢話，後生有後生結婚嘅好，到個仔大個，自己都仲好有活力。但係如果好似我地「咁大年紀」先結婚，好處就係思想成熟啲， 唔會係一時衝動，不過一結婚就要諗生仔啦！我就話，結婚真係要洗好多錢呢，至少二三十萬，佢就話，而家開始儲，一年後應該可以結婚啦！我就回答，聽落唔錯 喎！佢就話：
＂咁我當求左婚架啦！＂
下！求婚都whatsapp 搞掂！？我就話，我隻戒指呢？佢就whatsapp 隻emoji 鑽戒加紮花比我，話: "儲錢結婚嘛！要慳錢了，未來太太^_^ " 呀~~~~點算呀？我個夢幻求婚唔係咁樣架！蝕哂！
好彩，呢個衰佬唔係賤男嗰類縮骨精，唔會真係whatsapp求婚就算嘅。有一日我落機返到香港，佢喺佢一個做周大福嘅朋友間鋪度，我扮傻問佢，做緊咩 呀？佢就話: "望下啲鑽石啦，朋友話留左粒荀嘢比我。妳想點切割？" 我按捺住超級興奮嘅心情，話: "我鍾意心型！"點知佢話：＂哎呀原來已經切好左架啦！妳鍾意心型咁唔啱了。由佢啦咁！＂
噫！！分明玩我啦！佢實以為我會港女上身流哂口水咁話，唔緊要啦咩嘢型都照殺！好彩我都唔蠢啫，玩返佢，話，咁又係，慢慢啦，都唔急嘅。輪到佢哦左一聲就無聲出，哈哈哈。
但結果，都係比佢玩返我轉頭。
第二日佢約我食飯，我心頭暗喜，唔通係求婚飯？我仲幻想地點係羅曼蒂克嘅高級餐廳，有燕尾型男拉小提琴添，但結果，係迴轉壽司。無所謂啦，我最鍾意食壽司 啦，平民式嘅浪漫我都照殺！去到，咦，佢兩手fing fing 嘅？花呢？算啦，求婚三寶無左兩樣，有最重要嗰樣就得啦！點知食完成餐飯，我期待嘅事情始終無發生。點呀？原來係我諗多左？佢真係當我唔急，就咁算啦？
死了。恨嫁恨到出哂面了。
離開餐廳，佢無啦啦摷自己個袋，拎左張好似說明書咁嘅嘢比我，我望下，上面寫左鑽石嘅顏色呀切割呀等等嘅資料，後來我先知係鑽石證書嚟。但佢話呢張係鑽石換領信，訂就訂左架啦，不過唔知幾時先有貨，反正妳唔急，就等下啦。
未買過(未收過)鑽石嘅我當然信以為真啦，哦左一聲就收埋左張"換領信"。我望下佢，點解陰陰咀笑嘅呢？唔通有古惑？
行多個街口，佢又摷袋拎第二樣嘢出嚟，今次係個小巧嘅周大福紙袋！我相信我嗰刻係掩飾唔到嘅兩眼發光，即刻打開睇下先！係一個好可愛嘅蛋糕形戒指盒呀！我傻笑住打開佢，點知，
係吉嘅。
我隻鑽戒呢？？！！！
我嗰時個表情一定好好笑了，AX忍唔住露出狡猾嘅笑容，話:"呢個只係派剩嘅贈品，唔洗咁興奮喎！"再加兩聲可惡嘅哈哈聲。
比佢連橫玩左幾嘢，我都無哂心機了。點知喺輕鐵上，佢又摷袋。
仲要一路摷，一路望住我瞪大對眼。搞咩呀？
今次出現嘅係，一個紅色絨毛戒指盒。
我笑住叫佢咪玩啦，心諗佢係咪又攞啲吉盒嚟玩鬼我。佢將個盒塞比我，話，自己睇下啦。嗰下我feel到佢有少少怕醜添！
有少少懷疑加多多期待嘅心情，我打開左個盒，終於，我同我嘅小閃石相遇啦！
雖然唔係心型，但我都好鍾意呀！好閃好靚呀！但我扮哂冷靜，話，都幾閃吖，好靚吖，然後拎住喺手望望下咁。
AX話，拎住做咩呢？戴上去試下啱唔啱啦！但係我覺得，邊有女仔恨嫁恨到自己拎隻求婚戒指戴上手架！如果我咁做就實比佢笑足一世啦！所以我猶疑著，佢應該睇穿左我諗咩，一下就拎左隻戒指，然後極粗魯咁戴左喺我左手無名指上。
"啱啱好啦，幾靚！唔好除啦，戴住啦！"
我望住無名指上粒小閃石不停傻笑。偷望下佢，佢望住另一邊，陰陰咀笑，而且眼泛淚光咁添！
同時，佢拖得我隻手好緊好緊。
哈哈，可能你地會覺得，搞錯呀求婚咁大件事都咁求其嘅！但我覺得，嗰啲跪地大叫"嫁比我!"嘅求婚方法好唔襯佢呀！反而咁樣就正正係佢嘅style ！我同樣覺得好浪漫呀！
好，我同AX嘅愛情故事終於有個完美結局啦！但當然呢個唔係終結，而係幸福嘅開端！
祝你地都幸福喔~!!!
good story
回覆刪除so sweet^^
回覆刪除祝你倆永遠幸福!
回覆刪除