上回講到我同AX嚟緊會一齊飛呀，到底我地我遇到個咩神跡呢？
嗰班機我地一齊飛澳洲，平時我地上機前有得自己揀做邊個position 架，但嗰班機遇正個好鍾意話事嘅大家姐，一去到機場就已經幫我地編哂position。但佢竟然編左我同AX一齊service 特級經濟艙喎！嘩夫妻檔拍住上真係好啦！
上到機我地要做pre-flight check，即係檢查自己負責嘅zone 嘅equipment 例如氧氣筒呀、急救箱呀等等。我同AX做同一個zone ，當然一齊檢查啦，當我地打開一袋後備安全帶，竟然見到。。。。。
一本好舊嘅簡體字聖經！
我地兩個見到O左咀。首先，嗰袋安全帶係收埋喺個幾隱蔽嘅地方，無理由會有客人咁得閒收埋喺嗰度！再者，喺我地檢查之前，已經有航機保安員檢查左一次，而 家咁注重航機安檢，嗰本唔屬於飛機物品嘅聖經又點會有得留低？除非嗰個人覺得本聖經係神聖不可侵犯所以扮睇唔到啦，但又會咁啱我同AX做埋同一個zone 喎！咁多巧合同時發生，唔入耶穌數都唔得啦！
然後嗰程機無咩特別嘢發生呀，我地喺crew rest 時輪流揭本聖經，都無發現任何特別嘅remark ，都係普通聖經一本啫，到底穌哥想同我地講咩呢？
 |
| 喺澳洲落機就會見到呢架巨無霸。早安悉尼!! |
去到酒店，我地特登揀同一層樓嘅房，係佢幫我揀架，平時佢話之我啦，自己簽完房咭就半條人命咁拖住個喼返上房。今日佢好照顧我咁，等埋我先走，仲幫我拉喼添！
然後喺澳洲嗰二十幾個鐘都無咩特別，夜晚同其他同事一齊食飯，喺其他人面前佢都比以前客氣左，以前佢實會乘機狂寸我架嘛，一有位入就話我蠢。嗰晚佢不經意都流露出照顧我嘅小動作，感覺真係曖曖昧昧咁，好有地下情feel 架哈哈哈！
回港班機都同佢做同一zone，仲安排到一齊crew rest 添！機員休息室其實好似一間籠屋咁，又似日本嘅膠囊酒店，一人一隔兩呎半乘六呎嘅床仔，坐都坐唔直架。我一捐上床就大覺瞓，佢就瞓我上面嗰格。其實我地都 唔係第一次一齊瞓啦(喺飛機啫)，但嗰下感覺好特別，同佢好近，彷彿寧靜中都感受到佢嘅氣息咁。
瞓瞓下，我鬧鐘響啦，我估佢都未起身，咁我就轉一轉身向左外面，繼續合一下，佢話會叫醒我嘛。過左幾分鐘，我聽到佢喺上格跳落嚟，然後就feel到佢輕輕揭開我張簾，跟住一陣暖意由我手心傳來，係佢輕輕握一下我嘅手。
嗰個質感，嗰個力度，嗰種溫暖，我仲記得。嚴格來講，嗰次係佢第三次拖我隻手。無諗過佢用一個咁溫柔嘅方法叫醒我，好懷念喔！個衰佬而家叫醒我嘅方法係:撩我耳仔或鼻哥窿，仲要加多句: 有曱甴@@
落機反到香港，我地各自返屋企了。其實呢幾日我地都一直諗住飛機有聖經呢一件事，到底我地求神比個啟示我地，神係咪已經回應左呢？定係我地太蠢，唔明白？ 沖沖下涼，突然我好似開竅咁諗通左：聖經其實係神嘅話語，神比一本聖經我地，其實咪即係叫我地要聽從聖經教導去好好相處囉！沖完涼，我急不及待想話比AX 知呢個大發現，點知佢仲早過我一步。佢whatsapp 我，命令式咁講:
"我地而家就正式一齊啦！"
我睇到之後真係甜到入心！原來佢又係沖沖下涼諗通左聖經出現嘅意思，於是沖完涼就即刻打比我，點知我仲沖緊，咁佢就上住網先啦。點知一開fb，就傻左眼。
你地有無試過喺fb 版面見到旁邊彈出你n年前嘅今日講過咩嘢status? 我都試過，不過好少見到，後來點搵都搵唔反，而AX嗰晚彈出嚟嘅，係一年前嘅嗰日寫嘅:
"我要學識十全十美未必係最好，但天父比我嘅就一定係最好！"
佢話都唔記得當時點解會寫句咁嘅嘢，但頭先佢仲諗緊到底應該幾時勇敢踏出第一步時見到呢句嘢，簡直就係一個好大嘅鼓勵！其實呢個男人好麻煩架，好完美主 義，對自己要求高，所以對另一半要求都好高，妄想佢會搵到個同佢性格、喜好、價值觀完全一樣嘅老婆。一直以嚟佢都同我一樣，覺得對方同自己性格各走極端， 又睇到對方好多好多缺點，但同時又互相吸引住，所以當理智與感情角力中，佢就一定要搵個支持位去推動佢再踏前一步。而對一個基督徒嚟講，得到神嘅允許就係 最好嘅支持啦，因為"神所配合的，人不可以分開"嘛，只有靠著神去相愛，無論雙方有幾多唔同，我地都能夠彼此包容，互相尊重，咁先可以一生一世架嘛！
原來神喺一年前已經教左佢點做了，所以佢覺得"this is an order !" 就膽粗粗來個命令式求愛，車，佢都明知我唔會say no 架啦！
我地仲夾埋一齊改fb status " In a relationship" 添！雖然無寫明with 邊個，但所有common frd 一睇就睇得出啦！個個恭喜我地好似新婚咁。嗰晚雖然剛落機好攰，但whatsapp傾左好耐呀，到頂唔順要瞓覺先收手。
嘻，臨走佢話，晚安啦女朋友！我回覆佢話，好冧啊，男朋友，加一對心型眼，佢竟然回覆我一個拳頭。睇嚟佢對我粗魯嘅本色係唔會變嘅。。。
同AX一齊嘅開頭真係好有初戀feel架！佢原來係個怕醜仔嚟架，第二次出街先敢拖我隻手，仲要係我做主動架哇哈哈哈。其實都唔算係拖添呀，只係捉住咋， 我feel到佢手汗都出埋。係咁嘅，正式一齊後第一次出街，係同埋其他教會朋友一齊，我地於是就只敢並肩行，就算食飯一齊坐都無枱底玩手仔！咁我無理由做 主動架嘛！唯有等第二日囉！第二日我同佢飛同一班機，下午就喺佢屋企有gathering ，咁我就拖埋個喼上去，諗住之後一齊搭的士去機場。聚會完左朋友走哂，剩低我同佢，雖然一向都成日同佢孤男寡女共處一室，但第一次咁有遐想！你地應該估到 我諗啲咩，不過講明先，我地係基督徒所以我無諗三級嘢架！但一年無拍拖嘅我總希望有啲滋潤嘅！但。。。一滴都無囉。我地面對面吃完外賣就一人一間房換衫， 然後就出門口搭的士。
喺的士度，我同佢都坐到離行離laak架，邊忽似拍拖呀！可能佢都覺得怪，於是就拎個電話出嚟話比啲嘢我睇，乘機坐近啲。咁我又當然乘機坐近啲啦。其實佢 比咩我睇已經唔記得，因為醉翁之意根本不在酒！我借啲易話個電話反光，就用手輕輕搭住佢手腕。電光火石之間觸電感覺來了，大家都突然無再講嘢，靜到彷彿空 氣中都聽到彼此心跳咁。佢突然拎開個電話，反一反手，就將我隻手緊緊捉住，我feel 到大家嘅手震，心跳好似通過手心肌膚接通左，喺指間躍動。我地無好似拍戲咁對望呀，我估我嗰刻真係好似含春咁傻笑，我偷偷望下佢，佢面帶微笑望住前面，一 副得米嘅得戚樣。
雖然而家已經嫁作人婦，但諗起的士呢一幕都真係好有少女情懷架！
沒有留言:
張貼留言