25週小B大躍進！

哈哈哈！貶下眼我同AX嘅愛情結晶AJ小B就已經25週大啦，佢除左一日到黑當我個肚係彈床同沙包之外，我發現佢好似學到少少嘢，醒目左！

我懷疑佢分到爸爸同媽咪嘅摸摸架！早排咪話佢成日整古AX嘅，佢一摸就靜哂，搞到AX狂捽我個肚兼發狂咆哮。小B咁唔識做我當然要胎教一下！前日我趁佢跳舞之際就同佢講，要識做呀，比下面爸爸，起碼都打個招呼吖！果然胎教有效，轉個頭AX放工反嚟，小B已經靜左好一陣，AX例牌用佢嘅五指魔爪喺我個肚上又震又捽，過左30秒小B 都無反應。我心諗，o靚仔！比下面好喎！呢個係你米飯班主嚟架！第時你阿媽我無奶你飲，就要靠你老豆賺奶粉錢架啦！果然，小B好大力咁跳左兩下，我成個肚都震！AX好興奮咁「唔！」左聲，我當然賣口乖咁話：「哈哈阿仔同你打招呼呀！」

尋晚類似事件又發生，我瞓緊覺，AX半夜放工返嚟，一入屋就入房睇個仔。我瞓到烏烏下都無理佢，佢好靜咁伸隻手埋嚟摸我個肚，輕輕咁捽左幾下，小B就手腳並用咁打拳，踢到我好大力。我都覺得搞笑呀，呢個細路都幾有禮貌喎！

不過。。。之後成晚，只要小B feel 到AX 轉身，或起身去廁所，佢就會好緊張咁即刻「打招呼」，我原本瞓著都比佢整醒！下。。。我會唔會比太大壓力佢呢？我唔要做虎媽啊。。。

背影

你在英國東面的海邊沈思的背影
攝於2010年夏天
 

背影, 讓人感覺好沈重。而你的背影, 卻令我充滿遐想和期待。

忘了從何時開始, 喜歡上你的背影。可能是因為, 只有在你轉身背向我時, 我才有勇氣把目光在你身上停流。

喜歡從你背後看你耳朵的形狀, 端正的兩片耳朵緊貼著後腦, 每邊耳後還各有一顆黑痣的喔。我還喜歡看你後頸的短髮, 修的短短的看起來很棘手, 不知摸上去是什麼感覺呢。

有一次, 我緊緊跟在你背後。那是熙來攘往的街道, 我還故意走得貼一點, 好讓身邊繁忙的途人把我不經意的推向你。突然有人在你前面擋著去路, 你腳步急停下來, 緊跟在你背後的我就硬生生的把鼻子碰上了你的背, 嗯, 我嗅到你的古龍水香味。

你喜歡旅遊, 卻不喜歡留影, 只會用眼睛去欣賞和紀錄旅途風景的美。我卻喜歡在你不知道時把你的背影拍下來, 我要我的回憶也有你。

那年春天, 你在南生圍踏著單車聽著歌的背影

攝於2011年3月

 

英國．2012年初夏

 

 

穿梭在意大利威尼斯的小巷

2012年夏天

 

看著你的背影, 不知怎的有了一種很親切的感覺。好想好想從你身後抱抱你, 把耳朵貼在你的背, 聽聽你因為我突然而來的熱情而躍動的心跳。

 

終於, 你的背影不再寂寞。

 

我們會記得一起看過日落的美麗。2012年夏天, 攝於意大利威尼斯。

 

噢，被踢爆了。

話說我尋日放工後勁想食雪糕，咁就特登走去OK望下啦。我已經有成四個幾月無買過雪糕(去台灣火鍋吃到飽任食Haagen Diaz除外)，一行埋個雪糕櫃我簡直兩眼發光咁款。千揀萬揀揀左件有特價又糖份頗低嘅三文治，無寫明雪糕兩個字可能聽落健康啲啩，自欺欺人之行為也。

點知太興奮，一開個雪櫃就整崩左隻指甲。唔理了，食左先講。

好滿足咁食完，就扮哂無事發生過咁去搵老公。點知比佢見到我喺度搣指甲，就問我，整親手指甲？我一時口快快爆左:"比個雪糕櫃整爆左。"

佢即刻問:"點解會比雪糕櫃整爆呢？"

我:"呃。。。我開個櫃門。"

老公:"開櫃門做咩呢？"

我:"唔。。。望下啲雪糕。"

老公:"點解望啲雪糕呢？"

我:"唔。。。睇下特價嗰款同無特價嗰款有咩分別。"

老公:"咁點解。。。" 

我:"呀！今晚食咩好呢？自己煮好定出街食？屋企有餃子、通粉⋯(下刪100字)"

其實我知老公唔介意縱下我嘅，但我扮古惑比佢扮踢爆，都係情趣嚟^_^

我地之間有第三者！

啊~~~~~~~~~~~

我要投訴啊！同AX呢個衰佬結左婚一年未到，我地嘅第三者就出現了！以前每晚瞓覺佢都會拖住我瞓，自從第三者出現後，佢就改為摸住第三者嚟瞓！而且有咩事都以佢為先了，啊！我地位不保了！

好彩，呢個第三者暫時仲喺我控制範圍，我用我條36吋肥腩將佢緊緊包住，嚟緊四個月佢都最多只能夠洗出天殘腳對付我！

哈哈哈講到呢度都知我講緊嘅係我同AX嘅小B啦！不過佢未出世就巴巴閉就係真嘅，仲夾埋爸爸一齊烚我！估唔到咁快遺傳左AX嘅"優點"@@

有次我話頸痛，AX就話幫我按下，點知佢好大力，痛到我呱呱叫，話細力啲啦，但個衰佬仲繼續大大力按落嚟，話要用力先可以按鬆啲筋，忍住啦！我慘叫左幾聲唔好佢先收手，點知肚入面個𡃁仔突然勁大力起飛腳，嚇到我嗌左一聲。於是我苦口苦面咁話，好啦喎你地兩仔爺夾埋蝦我！AX就沾沾自喜咁奸笑。

小B好鍾意整古我架！佢趁AX唔喺度時就狂郁，手腳並用跳哂舞咁，我好興奮咁叫AX快啲摸下啦，點知佢一摸，就靜哂，無論AX點叫佢都無反應，頂多彈一下咁多。結果AX就話:"妳條腸蠕動咋？"

然後AX縮手無耐，小B又嚟料，但AX已經出左門口返工，又或者瞓到隻豬咁。其實AX好唔抵得我架！佢都好想感受下比小B踢到彈起嘅感覺！有次佢忍唔住了，狂捽我個肚，咬牙切齒咁話:"我要同佢玩呀~~~~~~"

開始擔心第時呢兩個大小不良會拆左間屋。。。

哈哈哈！

Facebook 專頁開左了

我真係太過得閒, 開左個blog 就開埋個Facebook, 好想趁呢段咁得閒嘅時間好好訓練一下自己做潮媽.... 無人鞭策真係會懶, 我連面膜都好耐無FU..... 唔想進一步比AX呢個衰佬笑我黃面, 我就要努力自保哈哈哈哈~~!!!

Facebook 專頁會介紹下我用過嘅好嘢, 荀嘢, 正嘢, 可以同大家分享之餘又可不停自我審查, 問下自己「你今日用左未」???

講講下先記得自己今日未搽肚紋膏。。。個肚開始嚟料, 好痕, 仲黑黑地, 希望佢可以救救我~~~

係喎個FB PAGE 係 www.facebook.com/flyingmama2013

美國嘢, 聽聞好勁

衰佬冧我篇(一)

講下衰嘢, 又講下冧嘢先~

AX呢個衰佬未同我一齊之前對我真係好衰架!! 我好記得初初識佢嗰時, 成班同事一齊食飯, 佢唔夠錢比, 就粗粗魯魯咁叫我幫佢比住先, 然後就特登激我, 追極都唔肯還錢!! 係都要等到第二次一齊食飯先冷大方咁話: 等我比。其實咪係用佢爭我D錢!!! 仲有呀, 年年佢生日我都會送件小禮物比佢架, 又或者搞個GATHERING 買個蛋糕比佢切, 但我生日就完全無表示喎, 不過可能我嗰時同件賤男一齊啩, 不過AX嘅孤寒性格就深深刻入我腦海!

突然諗起未一齊之前佢有送過嘢比我架, 爭D唔記得左tim!! 嗰時我有收集龜仔毛公仔, 有次佢自己行街, 見到街邊有唔同顏色嘅小龜公仔, 就打比我問我無咩色。我話我有齊紅黃綠黑白藍紫啦喎, 佢就哦一聲就收左線。點知幾日後我返工喺公司Mail Box 發現一袋嘢, 入面有4隻小龜, 顏色係粉紅粉藍桃紅同埋啡色, 正正係我無嘅顏色呀!! 我打比佢話, 多謝哂!! 佢話:"$10 隻架攞返錢嚟!!! "我話: "睬你都傻! 當係你送比我架啦!!" 佢就衣衣哦哦話是旦啦40蚊咪豪比妳囉!! 返到屋企我先發現D龜仔按一下會面紅紅講: "I Love You."

一齊左之後佢都唔係送過好多嘢比我, 不過就樣樣都好有紀念價值同好有意思。佢送比我嘅第一件禮物。。。大家一定估唔到, 係Gucci 性感內衣套裝@@ 佢話要我第時做佢老婆時著比佢睇喎!!!! 我收到時面都紅哂架, 但都要扮冷靜咁問佢, 點解係XS 碼!!! 太睇少我啦~!!! 原來佢係好幾年前買落嘅, 嗰時佢朋友做Gucci , 員工價大平賣, 得返XS同L, 佢唯有買XS啦, 佢話好彩買XS咋, 佢朋友買L, 就娶左個大碼老婆哈哈哈哈哈~~~

第二件送比我嘅嘢, 就係Tiffany 心心扣手鏈~ 咁大個女第一次收Tiffany !!!  佢仲寫左句: " Link your heart with mine... In Love." 比我, 冧死左~!!!!

中女的第一件Tiffany

第一年情人節我地DIY小禮物送比對方。我就整左個抱枕比佢(而家擺左喺睡房窗台鋪塵), 佢就話, 全件DIY太高難度啦, 佢就搵左個半DIY音樂盒, 自己選歌同上面D裝飾, 再用膠水痴好。呢樣都未係最冧呀, 佢送比我時話: " 音樂係CANON In D, 第時結婚就用呢首March in 啦!!" 搞到我一聽到呢首歌就眼濕濕, 不停幻想自己點樣著住婚紗步入教堂, 喺Canon in D 伴奏下一步一步行向我嘅新郎!!!! 而家夢想成真啦~!! 聽到呢首歌我仲係好感動架~!!!!

上面個公仔又真係好似佢

 好, 夠鐘煮飯!!! 再續~^^

(一) 衰佬烚我篇

(一) 衰佬烚我篇


一早講過AX呢個衰佬對我粗粗魯魯架啦！估唔到佢有感性溫柔浪漫嘅一面，一開始拍拖時真係冧到我暈架！不過，好快佢就回復本性！對我"一擔砂糖幾擔c"！

佢好衰呀！除左一開始拍拖時我whatsapp啲自拍照比佢佢會心形眼加句靚靚之外，直到而家都成日笑我面圓鼻扁！咁我個樣係純天然架嘛，當然唔會係木偶鼻V剎面啦！佢就成日搣我個鼻尖同面珠，話，等我幫妳搣脂先！又話比啲晾衫夾夾高啲個鼻先！噫！好衰呀！

仲有呀！早幾日我問佢，BB似我定似佢好呢？佢竟然話，似我同似妳老豆最好，兩個靚仔。咁我就話，吓！咁總有一part 似我啩？佢話:" 耳仔啦！無咩人留意到。"

呀~~~~~~~~~~~~~

除此之外，佢烚我嘅方式真係層出不窮架，無論係行動上或言語上。

有次我坐喺梳化睇電視，佢喺廁所出嚟就走埋我度，好溫柔咁摸我個頭。係女人一被男人摸頭就會變左隻貓咪架啦，我即刻啟動撒嬌mode ，點知佢話:" 買返條抹手毛巾先，洗完手無地方抹！" 呀~~~~~ 原來當我個頭係抹布！

有次我發現自己有條白頭髮，當堂慘叫啦，死啦！有白頭髮啦！點算點算！佢望我一下，漠不關心咁講:" 有咩所謂呢，反正遲早都白哂架啦！" 噫！！！

仲有呀，之前講過佢最鍾意撩我耳仔同鼻哥窿！唔止用嚟叫醒我架，有時我地一齊攤喺梳化睇電視，佢攬住我，摸下我啲頭髮，當我沈醉喺溫馨感覺時，佢就會突然拎我啲頭髮撩我耳仔！嗰下痕係直入心兼打哂冷震架！佢見我恐慌大叫就會哈哈大笑！

呢個衰佬仲有好多烚我嘅招式架！結左婚後發現更多！