我地之間有第三者！

啊~~~~~~~~~~~

我要投訴啊！同AX呢個衰佬結左婚一年未到，我地嘅第三者就出現了！以前每晚瞓覺佢都會拖住我瞓，自從第三者出現後，佢就改為摸住第三者嚟瞓！而且有咩事都以佢為先了，啊！我地位不保了！

好彩，呢個第三者暫時仲喺我控制範圍，我用我條36吋肥腩將佢緊緊包住，嚟緊四個月佢都最多只能夠洗出天殘腳對付我！

哈哈哈講到呢度都知我講緊嘅係我同AX嘅小B啦！不過佢未出世就巴巴閉就係真嘅，仲夾埋爸爸一齊烚我！估唔到咁快遺傳左AX嘅"優點"@@

有次我話頸痛，AX就話幫我按下，點知佢好大力，痛到我呱呱叫，話細力啲啦，但個衰佬仲繼續大大力按落嚟，話要用力先可以按鬆啲筋，忍住啦！我慘叫左幾聲唔好佢先收手，點知肚入面個𡃁仔突然勁大力起飛腳，嚇到我嗌左一聲。於是我苦口苦面咁話，好啦喎你地兩仔爺夾埋蝦我！AX就沾沾自喜咁奸笑。

小B好鍾意整古我架！佢趁AX唔喺度時就狂郁，手腳並用跳哂舞咁，我好興奮咁叫AX快啲摸下啦，點知佢一摸，就靜哂，無論AX點叫佢都無反應，頂多彈一下咁多。結果AX就話:"妳條腸蠕動咋？"

然後AX縮手無耐，小B又嚟料，但AX已經出左門口返工，又或者瞓到隻豬咁。其實AX好唔抵得我架！佢都好想感受下比小B踢到彈起嘅感覺！有次佢忍唔住了，狂捽我個肚，咬牙切齒咁話:"我要同佢玩呀~~~~~~"

開始擔心第時呢兩個大小不良會拆左間屋。。。

哈哈哈！