(一)在3萬5千呎高空上愛上你 --- 我同老公嘅愛情故事

我同老公嘅愛情故事 (一)在3萬5千呎高空上愛上你

大家好~! 多謝你地由BK開始就支持我嘅POST 呀~!! 詢眾要求我終於開左個BLOG啦~!! 而家我將D POST 集合埋一齊, 方便大家重溫嘛~!!!

 好啦~ 而家同大家重溫下我同老公嘅愛情故事!!! 有個好老土嘅故事名:

<<在3萬5千呎高空上愛上你>>

我喺度簡稱老公仔做AX啦。我同佢一齊左兩年，結婚未夠一年，但相識左5年啦！我係入航空公司做時識佢嘅，我地係同班同學仔，一齊 training，一齊著上制服飛上天！當時我地一班有十幾個女仔，有靚女有單身，但唔知點解我同佢特別熟。我嗰時同緊一件賤男一齊，AX喺我眼中同其他女同 事無咩分別，佢份人好姿整，又有啲婆媽兼愛講是非，加上佢當時聲稱已單身左幾年，對任何女仔都睇唔上眼咁，開頭我地有懷疑佢性取向架哈哈哈！

Training 完，大家各自出嚟飛，我地都唔係成日見面，係有時咁啱一齊飛先會約埋食飯或者買嘢返酒店房一齊煮。不過我地就差不多日日聯絡，除左一齊喺香港會通電話之外，嗰時興msn 嘅，我一上線佢就會wei 我，不過都係吹水講無謂嘢或講下公司是非。

我地真係好少講心事，佢嘅情史我差不多唔知咁滯。擇偶條件我有問過佢架, 佢話過，要搵一個同佢一齊感覺似好朋友嘅，因為咁樣大家先會包容到對方喎。

我當然唔會估AX係唔係暗戀我啦，一來我當時有男朋友，二來我覺得AX對我一啲感覺都無架！佢成日話我蠢，又嫌我白痴揀左個廢柴男友只顧住吃喝玩樂，無啲遠見，佢話過佢另一半一定要係個事業型女強人架！小鳥依人嘅小女人唔啱佢喎！

不過呢，我同佢一齊嘅感覺有啲怪架，喺電話我地可以吹水吹足成個鐘，但一面對面，佢一係就喺其他同事面前狂寸我，但得我地兩個時就成日dead air 無嘢好講，好鬼唔自然架！我仲留意到佢會同其他女仔朋友搭哂膊頭老友鬼鬼咁，但對住我呢，就好似好小心翼翼，連掂到我手指尾都驚咁。。。。

但我當然無去深究佢搞咩啦，嗰時我只對賤男男友一條心。不過有次AX生日，我地飲大左，發生左啲事。。。。。。。



飲大左發生左啲事，正常人都會諗邪嘢啦。。不過，我同AX真係純過蒸餾水架，我地只係。。。

嗰日傍晚我地成班同事一齊遊船河釣墨魚，唔知幾時開左紅酒嚟飲，然後仲有白酒champagne ，溝埋飲左一輪之後，我都已經飲大左，連點樣落船點樣上小巴都唔多記得，總之最後9唔搭8跟左AX另一班朋友去唱K。好笑，去到K房，成班人我都唔識，我 仲同佢地講，招呼唔到呀！搞到AX啲朋友一頭問號，問AX，呢個你女友呀？

落船嘅時候睇到嘅嘢應該同呢幅相差不多...

AX點答我真係唔記得啦，我知佢都同我一樣飲大左，處於興奮狀態。其實飲過酒嘅人都知，酒醉真係三分醒架，我on and off 記得我地做過啲咩架，有啲位仲好搞笑添。全晚我地勁玩大話色同十五二十，嗌到聲到拆埋，又一齊無啦啦攞佢朋友包煙嚟食，但我地兩個都唔食煙架嘛，食左一啖 就大叫好難食掉左，激死佢朋友，猛話我地兩個癲夠未，我地就哈哈大笑。

我第一次同AX玩得咁開懷，所以距離都拉近左，我地第一次有身體接觸^_^咪心邪，係猜拳玩partner 時佢成日輸，我就不停捽佢啲頭髮咋！然後玩玩下我好攰，唔自覺就挨埋佢度，佢開頭有話我好重推開我架，不過慢慢就由得我挨了^_^
仲幫我頂哂啲酒添。

玩到三點幾，我出去廁所，反嚟就見到佢棟喺房門度，拎住我電話，原來佢一直幫我袋住個電話。佢話賤男原來打過九十幾次嚟喎，全部miss call。我嗰下先如夢初醒，大獲了，完全唔記得左呢個人！我慘叫，死啦佢實嬲死我了，點算好。AX輕輕攬我一下拍下我膊頭，話，驚咩啫妳又唔係做啲左咩 對佢唔住！佢再打嚟等我幫妳同佢解釋！然後仲拖住我隻手返入K房@@

嗰刻我個人都仲迷迷地，比佢拖住都無咩感覺，轉頭賤男又打嚟了，AX又拖住我行出K房，幫我聽電話。我好似聽到AX話，我好驚佢嬲所以叫朋友幫我解釋，又叫賤男唔洗擔心，而家出面黑麻麻，一到天光就即刻幫我call 的士送我去賤男屋企喎。

然後玩玩下就天光了，我地埋單走人，我跟左AX啲朋友落左樓下，點知AX以為我仲喺廁所，狂叫啲女仔搵我！佢朋友同我講，佢以為我仲喺廁所，咁耐唔出嚟， 勁擔心，爭啲衝入女廁搵我。我嗰時已經清醒返唔少，聽到佢咁緊張我，都有一啲sweet 嘅感覺。AX落到嚟，即刻衝埋我度，話，原來你落左嚟啦。跟住佢就拖住我隻手，行去的士站。

因為我都差不多酒醒了，所以好清楚AX拖住我嘅感覺，我記得我係有心跳加速嘅感覺嘅。行左20秒左右就上的士了，佢比左二百蚊我，千叮萬囑我到左賤男屋企一定要比個電話佢，等佢安心。

嗰下真係有比佢感動架，突然覺得原來平時冷型嘅AX都有溫柔體貼嘅一面，可惜一刻感動好快就撲滅了。我見到賤男就咩都唔記得，連電話都無打比AX。到我沖 涼時AX就打比我，賤男聽左。後來賤男講返比我聽，AX係咁話唔該哂，麻煩賤男好好照顧我。賤男仲冷笑話我呢個朋友都唔錯添，得閒叫埋佢一齊玩喎。

其實回想起呢件事我都覺得好sweet 架，我地第一次拖手仔，就係咁發生了。雖然之後無哂下文，但都因為呢件事，令AX喺我心目中升呢，由普通朋友變為重要嘅朋友。