唱K拖手事件之後我都有心思思AX到底係咪暗戀我。因為以佢性格，平時連掂我手指尾都驚，點解飲左酒就會咁大膽公然喺朋友面前拖住我呢？佢嗰晚都有high high 地咁同其他女仔朋友搭哂膊頭攬頭攬頸咁，但就選擇拖住我隻手，咁係咪表示我喺佢心目中係與眾不同呢？
哎吔吔雖然而家佢每晚都拖住我瞓覺，但我都好想好想知佢嗰刻諗咩呀！一齊之後我有問過佢架！佢開頭話唔記得自己點解會咁喎，後來又話，拖住我，係潛意識想同我講，我可以有更好選擇喎！但又唔肯直接承認嗰時已經鍾意我，咁即係點呀！你地有咩意見呀？
總之拖手事件後來不了了之，但有一排我同AX相處嘅感覺好怪，我地兩個都好似好驚單獨相處咁，死都要拉多個人喺中間。拖手事件相隔左兩星期左右我地第一次 再見面，一班朋友去大浪灣玩，一見到面我感覺到大家都有啲尷尬咁，刻意唔望對方，各自痴埋其他朋友度，又全程車都無講過嘢。去到大浪灣落車，我見佢自己一 個行過去間士多度，就跟埋過去，諗住乘機扮無嘢打開話題啦。佢一見我行埋去，就扮哂無嘢了，問我放唔放風箏。我話我唔識架，佢就乘機寸我，妳咁蠢邊識吖。 我又寸返佢放風箏邊洗用腦架。然後我地仲一齊揀左隻風箏添。
燒完嘢食游完水，係時候放風箏了。我地要行上一個小山先可以放，但其他朋友都好似無咩興趣咁。其實以前我地會兩個人都照上山玩架，但嗰日大家都好有默契咁 死都夾多個女仔朋友一齊。上小山條路要經過石灘架，有個位要稍為擒上一舊大石，AX好衰呀，伸手扶個女仔朋友一下，到我擒時就只係望住我，仲加多句，小心 呀仆死妳呀！噫！佢嘅"掂我手指尾恐懼症"又發作啦！
上到山，其實得我同AX玩囉，女仔朋友嫌曬躲喺亭入面睇我地玩同幫我地影相，結果我地影左勁多超白痴反眼大笑狂奔照@@
 |
| 放風箏嘅大浪灣山頭 |
哎呀應該結婚嗰日成長片段show 嗰批相，忘了。。。
之後我地都仲好似以前咁有電話吹水、日日msn，而慢慢大家都丟淡左拖手事件，見面都無咁尷尬了，但都總係有啲唔自然咁嘅。
而我就係呢段時間開始同賤男男友有意見分歧了，我諗係AX生日唱K事件令賤男挑起對AX嘅敵意，加上我喺賤男面前讚AX識為未來打算投資買樓，所以引致 賤男視AX為情敵。我同AX唔想惹人誤會就少左通電話，但唔洗半年之後賤男就搭上左個小賤人。比我知道後就分左手。
我記得嗰日AX喺英國，我Msn 佢話佢知賤男同左第二個一齊比我發現，而家分左手了。AX即刻打IDD 比我，我就將成件事一五一十話佢知，我講講下仲喊添。AX唔係嗰啲會好溫柔安慰人嘅人，佢無講啲咩，只係約我第二晚去機場接佢機順便食飯傾計。
但第二日我地見到面時，所有說話又好似吞哂入肚咁，喺餐廳成個鐘，我地除左傾下佢班機有咩特別外，我地都無主動提賤男。食到尾聲大家dead air 左，我低頭搞緊我杯飲品，若有所思嘅樣，我feel到佢望住我。佢從來都唔會同我有eye contact架，就算講嘢都唔敢望住我咁。所以嗰下佢望住我，我好容易就feel到。佢應該見到我眼都腫哂，講左句，"喊過嚟咩？"其實喺我嚟機場見佢 之前，我都已經斷斷續續喊左成日，眼唔腫就怪啦。佢咁一問，我忍唔住滴左滴眼淚喺枱。佢無出聲，都無好似拍戲咁伸手幫我抹眼淚，只係深深歎一口氣，話，" 為個咁嘅人，值得咩？"
嗰日之後，AX搵得我密左，可能唔再驚賤男誤會，我地出嚟見面都多左好多。但感覺照舊奇怪，我地會去食飯睇戲行街，仲上過山頂行過尖東海旁，但一直都好少 嘢講，去到尖東海旁我地只係一人一杯綠茶latte並肩坐喺度睇日落，望住週圍嘅呱呱叫騎呢自由行，我地嘅世界好似特別寧靜，喺佢身邊就好似連呼吸都緩慢 一啲咁。其實到而家我地都會兩個人去海邊吹吹風唔講嘢享受下寧靜，或者呢啲就係只有我地先可共同擁有嘅另類浪漫？
 | ||
| 有日我地上左山頂 |
 |
| 一齊睇過嘅日落 |
其實我一直都唔相信男女之間可以有純友誼，以我經驗所有男人approach 我話做朋友都係因為想溝我。之前幾個男友都係做左一頭半個月朋友就嚟料，所以我從來都無普通異性朋友。AX係第一個同我咁close 但又keep 住咁耐只係朋友嘅男人，仲要手仔都拖過都仲係原地踏步，我都覺得有啲不可思議。
不過其實如果當時AX就向我表白，我未必會應承，因為我覺得同佢性格係兩個極端嚟，佢好冷靜好理智，人又悶又不解溫柔咁，我成日覺得做佢女友一定好無情 趣。而且佢嗰時對我都係粗粗魯魯咁，點睇佢都唔似暗戀我啦！結果三個月後我同返賤男一齊，喺AX知道嗰一刻，我竟然feel到佢嘅心痛。。。
沒有留言:
張貼留言