繼的士掂手仔之後，我地成8日後先見面！嗰8日我地靠whatsapp 聯絡咋，但真係估唔到佢淨係用文字就已經冧到我死死下啦！
例如佢喺英國落機，嗰時剛好日出，個天好靚，佢就影左張相比我，加多句，"以後我望到咁靚嘅天空都會諗起妳。" 又例如佢聽到胡杏兒嘅<浪漫世紀>，又會quote 啲歌詞比我:" 我有著妳任何地方都有力氣，妳令我任何事都撐得起，歡喜與悲沿路刻骨銘記，挽著我也是妳手臂......我鍾意呢首歌，歌詞送比妳！"
嘩我真係完全無諗過佢係個咁浪漫嘅人！開頭仲以為佢份人木獨又粗魯又無情趣添！但原來浪漫深情嘅一面，佢只會表露喺深愛嘅人面前！哈哈好嘢我賺左啦^_^
 |
| "望到咁靚嘅天空就會諗起妳" ~ 冧死了~!!!! |
到終於見到佢啦，哎吔真係掛死我了。我地喺教會見面嘅，一如概往，我地見到面都好生外咁嘅，我地唔會第一時間衝埋對方度架，只係喺遠處偷偷對望微笑，噫~ 搞到聚會時我完全集中唔到。終於等到聚會完左，係聚餐時間，教會訂左pizza ，但可能唔夠食，AX就自告奮勇落樓下追加，佢仲打眼色叫我一齊去添。
喺電梯口終於得我地兩個了，但我地都係對望微笑下，嗰啲情侶久別重逢嘅擁抱場面並無出現。沿途去買pizza 我地都係並肩行咋！我心諗，點呀？唔通又係我做主動？雖然我本身其實係飛禽大咬型，但對住AX，我真係想保持淑女形象喎，免得佢以為我係豪放女啦！
並肩行左幾分鐘，我地嘅手背其實一直曖昧地隨著身體擺動而掃掃下。我真係好想主動拖住佢呀！但又唔敢喎，點算呢點算呢！嗰下感覺真係好似初嘗戀愛滋味嘅小 女孩咁，心情既緊張又期待。我地一直喺度吹緊無謂嘅水架，突然，AX好似掙扎左好耐終於下定決心咁，深呼吸一下，然後，好man 咁拖住我隻手。我當然扮哂自然咁啦，繼續同佢講無謂嘢，其實都不知幾鬼開心，噫，終於有拍拖嘅感覺啦！繼兩年幾前唱K拖手事件，我地嘅左右手終於再次遇上 了！
我地就係咁一路拖住行到去買pizza ，就算佢要拎銀包比錢，佢都唔捨得放開我咁，改為叫我繞住佢手臂。我當然唔放過小鳥依人嘅機會啦，乘機挨落佢膊頭。身邊個男人夠高真係唔同啲呀！我可以好 舒服咁將個頭挨哂喺佢膊頭近手臂嘅地方，雖然佢無結實嘅肌肉，但總好過賤男呢件死矮仔吖挨到我頸都歪。
嗰晚各自返屋企之後，佢急不及待就約我第二日去拍拖仔了。我地都幾特別，去左中環海旁拍拖行到去北角，我仲要著住高跟鞋呀！但唔知點解一啲都唔覺得攰呢， 時間仲過得好快添！行到北角就8點幾了，我地一路行一路傾計，主要都係講自己屋企，同埋細個啲嘢，我地從來都無面對面傾咁多計架！仲要手拖手，感覺非常良 好。行到北角，佢提議搭電車去太古城覓食，咁我地就上左車。
食完飯都已經十點幾了，佢就陪我搭地鐵返屋企。太古嘅自動電梯好長，我企落一格，我個頭就只去到佢心口。開頭我側側地身咁企，佢就拖住我，突然佢改為搭住我膊頭，咁我就順住個勢攬住佢，將耳仔緊貼佢胸膛，聽佢嘅心跳。
呢次都算係我地第一次攬攬@@
返到屋企，佢就whatsapp 我，話:" 今次死了，中左毒，好掛住妳添，好鍾意拖住妳隻手，細細隻好軟好舒服。" 又話好想緊緊攬住我，攬到我透唔到氣嗰隻，要感受我嘅心跳同體溫喎。
於是，第二日佢就直接嚟我屋企樓下搵我，今次唔止比佢攬到透唔到氣，仲連腰骨都痛埋添！諗起我都覺得呼吸困難啊！
沒有留言:
張貼留言