講起嗰段暗戀的時光都好sweet咁。我咪話唔相信自己真係鍾意左AX嘅,其實開頭我都驚我係因為分手無耐心靈空虛而將AX當代替品架,但後來我發現自己竟然接受左AX一向嘅缺點,有啲缺點真係連其他朋友都有微言架,但我就一啲都無反感喎,所以咪引起其他朋友懷疑囉!
最明顯有次,AX話想買支結他,我同一個教會朋友陪佢去睇,首先我地去左屯門兩間,睇唔啱,就坐車出青衣,再唔啱,就急急腳跑去搭車出荃灣。嗰下朋友已經 少少黑面了,但我就完全無不滿,反而好似好明白AX嘅完美主義咁,陪佢狂跑追車。到後來去到荃灣都睇唔啱,朋友就少少發脾氣話走先了,我見勢色不對就話陪 朋友去食嘢,咁AX就唯有自己返屋企先。但臨走前佢約我第二日出尖沙咀間大通利,我好開心咁話好添!
坐低食嘢後,朋友問我覺唔覺AX太過份,迫我地陪佢跑足一日。我竟然一啲都唔覺,仲話,一眼睇中就買,嗰個都唔係AX啦,佢係完美主義架嘛。朋友就話,咁 佢咪自己睇囉,又要人陪。我想再一步幫AX講好說話,就比朋友一語道破: 其實你覺唔覺自己對佢太好,超越左朋友嘅感情?
我當時係否認架,比人當面踢爆好瘀啦,我咪即刻轉話題囉。不要講真吖,我又真係做到好鬼出面。
嗰段期間我仲有膽粗粗做啲小女生暗戀學長嘅白痴嘢,例如知佢同我前後腳飛同一地方,我臨離開酒店返香港前就喺reception 留低啲嘢比佢,例如知佢帶病返工,就留支維多C,情人節佢要飛,我就留一條金莎朱古力比佢!不過佢收到竟然完全無反應呀!多謝都無聲!搞到我都唔知到底係 咪酒店落左格!
望住異國嘅天空偷偷想念喺地球另一端嘅AX |
點知個傻佬隔左半個鐘就打比我,問"蕃茄薯仔煲豬睜定豬骨"
我笑左,鬧佢,你又係咪心靈空虛呀!咁大個人煮餐飯都要問人!佢EE哦哦一輪就收左線。但我心情就好返哂了。其實根本無聊就係我地嘅相處方式!
過多一星期左右係我生日,嗰日下午我地一行四人去左南生圍踩單車,其間AX不停講電話,神神秘秘咁,我朋友就問佢,搞咩咁忙?佢就話,約緊人夜晚唱K。仲 話做搞手,無計啦。原來佢約緊另一班朋友陪我唱K慶祝生日!不過有個失望位,就係點解無生日蛋糕架!我仲幻想AX會買蛋糕架嘛,但無囉。不過嗰晚我又飲大 左,而AX就好奇怪,全晚滴酒不沾。有朋友問佢點解一啖都唔飲呀,佢無出聲,另一個朋友就幫佢答,佢廢事酒後亂性呀!
結果嗰晚,我上左AX屋企。。。
沒有留言:
張貼留言