好啦！到戲玉啦！中女表白事件！
其實我覺得一切都係整定。原本我嗰個星期會自己一個人去日本旅行，但早一個星期，教會有個佈道會，我識左10年嘅好朋友決左志信主喎！咁我好開心啦，就應承下星期帶佢返教會啦，結果連旅行都唔去了。
講起個佈道會，好有意義架，就算唔係基督徒都會有所啓發。個主題係"尋找真愛"，喺佈道會我學識左一樣嘢，就係"愛唔係鍾意嘅昇華，其實愛同鍾意，係相反 嘅。"又係喎！我地會鍾意個明星，因為佢靚仔，唱歌好聽，演技精湛...總之就係一啲好外在又正面嘅好條件令我地鍾意佢。但愛呢？你會見到媽媽攬住智障女 兒，阿婆攬住失明老公，哥哥攬住毀容細佬，不離不棄，呢啲先叫愛！所以，鍾意，係因為對方嘅優點吸引，但愛呢，就無論對方有幾差，有缺陷，你都會愛佢！
聽完，我望住坐前面嘅AX，心諗，我可以包容佢啲乞人憎缺點喎，咁我咪係愛佢囉！
 |
| 愛是恆久忍耐。。。愛是永不止息。 |
嗰日我嘅好朋友決志信主，佢嗰排受情傷好抑鬱，知佢肯接受耶穌幫佢，我好感動呀，因為我都係由耶穌帶出感情困局的，所以感受好深。AX坐我前面，佢知道都 好開心，帶左我地出去搵個同工姊妹幫我朋友祈禱。同工姊妹就叫我地圍圈一齊拖住手祈禱，原本呢個神聖一刻我應該好專心，但我就控制唔到個心亂跳呀！因 為。。。因為。。。AX拖住左我隻手！
我手都震埋，AX就好似咩事都無咁，好專心咁祈禱，之後仲同我朋友傾計，一啲異樣都無。反而我就好似撞邪咁，呆呆地，心跳亂哂又語無倫次，好耐都回復唔到正常。噢！耶穌係咪玩我哈哈哈！
一個星期後，原本我身在日本架！但就因為陪朋友返教會而留左喺香港。結果嗰晚，就發生左表白事件。。。
無啦啦點解我會被篤爆架呢？話說有一個弟兄，叫阿肥，佢份人怪怪架，好鍾意亂打電話比啲姊妹吹水，嗰排佢都成日打比我。嗰晚我地一行四人去左食糖水，講起呢個阿肥，AX講左句:"呢個人心靈空虛就亂咁搵人吹水！咪理佢啦，最煩係呢啲人！"
"心靈空虛"四個字篤中我要害！記唔記得AX同樣話過我？咁言下之意即係佢都覺得我煩啦？我即時黑面，無再講嘢，離開時更byebye都無講掉頭走。好 笑，AX嗰日剛落機拖住個喼，佢見我唔睬佢，竟然一路跟住我，去到一個位要鑑過一個花槽，佢個喼kick 住左，佢就哎呀左幾聲，我先望下佢。我好惡咁問佢跟住我做咩鬼，佢就9唔嗒8咁話，行下嚟巴士站。其實佢屋企係反方向架！我仲嬲緊，就話，痴線架無啦啦行 下嚟巴士站托咩。然後就加速逃走上左巴士。
一上左巴士三十秒都無佢就打比我，用一種從未用過嘅語氣問我，做乜鬼呀妳。
我唔知點形容嗰隻語氣，係扮輕佻之餘有少少曖昧架，其實成個通話氣氛都非常曖昧，我地未試過咁樣交談架！佢咁問，我就港女上身寸寸咁話，無嘢呀。佢就話，無嘢妳又嬲住走左去？我就單刀直入，問佢係咪覺得我成日搵佢，好煩。
佢嗰刻先如夢初醒：＂哦~~~我話阿肥，妳就覺得我話妳，所以嬲。哎呀，其實妳又點同阿肥呢？＂
然後，佢竟然打蛇隨棍上，問我：＂但係點解妳咁在意我講嘅說話呢？＂
哎呀，點呀！你叫我點答你喎！我無答呀，喺度衣衣哦哦。佢就更得戚了，話，＂我知！妳一係就心靈空虛搵我做代替品，將感情錯誤投射喺我度⋯一係就係⋯妳真係鍾意左我！＂
嘩！我嗰下爭啲休黑！個腦完全run 唔到，好似智障咁！AX咄咄逼人，我只有發出＂吓？er.......唔..."等無意義嘅怪聲。
AX見把握愈來愈大，就愈來愈囂張。仲笑我，咁大個人仲含春咁，係就係，唔係就唔係囉，怕咩認啫。哎呀點好呀！被踢爆了！我甚至希望電話呢個時候斷線呀！平時行呢條路都至少斷三次架！點解今日收得咁好！我呼叫救命，耶穌！你係幫我定玩我呢！
唉，無法了，可能係上天比個機會我地呢。。。我唯有承認:"係囉，比你估中啦。"
點知。。。我預期嘅浪漫對話並無發生，收線後我仲無啦啦大喊一場添！
沒有留言:
張貼留言