上回講到我終於等到AX表明心跡啦！原來佢之前話要消化下，並唔係消化不良，而係好似牛咁要反縐。都好吖！至少知道佢都係喜歡我吖！最重要係，知道佢真係一個用情認真嘅人嚟，佢好清楚自己要啲咩，而唔係嗰啲有女冧自己就食左先講嘅賤男。
事發之後成晚囉囉攣，因為第二朝就會喺教會見到佢啦！一見到佢我簡直心都跳埋出嚟，完全唔知自己係咩表情，而佢就用一種好特別嘅眼神望左我半秒，似笑非笑 咁，然後就逃難咁走去搵其他弟兄。哈哈！唔知典點我嗰下都想逃難呀！所以我都求其拉住個姊妹吹水，其他人應該睇唔出我地有古怪啩。
完左聚會我仲要留低開會，開完會出嚟已經唔見左佢了，咁我就自己返屋企啦。去到巴士站就收到佢whatsapp ，話因為頭先有朋友上佢屋企所以無等我就走左。我話，咁你陪朋友啦，佢就話，唔好啦，同妳傾多陣先啦。
然後我地嘅話題都係吹下水、或圍繞今日教會講嘅嘢，同平時都無咩分別咁。我地都傾左成個鐘呀，傾到我都差不多落車了。佢朋友原來一早走左了，希望唔係比AX 激走左啦，掛住篤電話。
AX 見我就落車，就話唔講住啦去沖涼先。但過左一分鐘又再叮我，話: "都係唔好，等埋妳返到屋企先。"
嗰下真係好冧呀！我第一次feel到佢緊張我，我真係喺車不停傻笑。佢仲話，落左車就唔好篤電話啦，小心行，返到屋企先覆佢啦。噫~~ 雖然我地未正式一齊，但已經好有被呵護嘅女朋友感覺了。佢從來都無咁溫柔同過我講嘢架！雖然只係whatsapp 簡單幾隻字，又無BB豬豬嗰啲，但已經成功冧到我了，換轉以前，佢只會話: "一路行一路篤電話因住仆死妳呀！"
跟住嗰日係中秋節，我同佢分別同屋企人渡過，所以無見面，但就全日whatsapp 左1x個鐘！我地傾左好多好多嘢呀，包括一直以嚟對大家嘅感覺、佢係點樣知道我鍾意左佢、同埋對愛情、婚姻嘅睇法。佢之前一開始feel到我有嘢嘅時候咪 有少少避開我嘅，佢話嗰時我同賤男分左手幾個月，佢會驚我係一時寂寞而將痴心錯付，最驚我又好似上次咁又痴返賤男，所以寧願退一步睇定啲先。到巴士表白事 件之後，佢認為要更加小心，因為我都出到聲啦，即係佢無得扮傻要做決定了，但佢嗰下好矛盾咁，一方面唔忍心我痴痴地等，但另一方面佢有好多嘢未諗通，一來 佢仲對我同賤男呢條喊包嘅過去未能完全釋懷，二來又唔知同我work 唔work out 到，佢話過要搵老婆架嘛？一生一世架喎！哇估唔到佢用咁高嘅標準去評審我，真係受寵若驚。
可能有啲jm會覺得好忟，男人老狗拖拖拉拉咩都驚一餐，應該勇敢去愛！但我唔係咁諗囉！未拍拖就幻想同妳一生一世喎！嘩真係浪漫到暈了！我完全覺得自己執到寶架！哈哈哈！
咁我當然有問佢，係咪一早就鍾意左我啦，佢無正面回答喎，只係話，事到如今，邊個鍾意邊個先已經唔重要了，最重要係個結果！其實我有種感覺，佢驚我內疚， 所以唔敢爭住做情聖。因為如果我知道原來一直喺風雨中痴痴為我等嘅人係佢，而我就咩都唔知繼續同賤男風流快活，實内疚死我啦！噢！佢真係超好超細心哦！
嗰日同佢足足傾嗰十幾個鐘，大家都好清晰對方諗啲咩，好開心我地嘅婚姻觀、大方向都好夾呀，但佢話，好想同我一齊經歷一個神跡，不如試下祈禱問下耶穌意見吖，如果耶穌都贊成我地一齊，就請佢比個啟示我地。
然後我地先發現，下班機我地原來一齊飛！嗰班機人地同我調返嚟架，我之前完全無理過同邊個飛，而喺嗰班機我地就遇上一個神跡啦！
 |
| 2011年的中秋節, 期待人月兩團圓喔~ |
沒有留言:
張貼留言