上回講到我突然同返賤男一齊，令AX好心痛。跟住嗰大半年，我同AX少左好多聯絡，一來我估佢驚賤男誤會啩，二來我都覺得唔知點面對佢咁。嗰段時間我同賤 男都發生左好多事，我好唔開心，掙扎緊到底仲應唔應該同呢個人一齊。我甚至諗，如果當日我無同賤男復合，我同AX嘅發展又會係點呢？
AX 間唔中都有搵下我嘅，但都已經疏遠左好多。後來慢慢到我真係好唔相信賤男打算同佢攤牌時，我忍唔住打比AX傾計。
嗰日我地傾左好耐，我發現佢變左，以前同佢吹水總係粗口橫飛言詞刻薄的，但嗰日一句都無，斯文左好多。我第一次感到佢真心想幫我解決而家困局。原來佢嗰段時間返左教會。
以下將會有啲涉及基督教觀點，純粹分享絕無宣教意圖，不喜勿插^_^
其實AX好多年前已經係受浸嘅基督徒，不過就有幾年無返教會了，佢話有日上一棟商業中心搵朋友，無啦啦聽到隔離教會唱詩歌，覺得幾好聽幾舒服就入左去坐， 之後就keep 住個個星期日返去了。佢話返左教會之後諗通左好多嘢，明白到一切都係神安排，我地心急唔嚟，可以做嘅就只有禱告交托比神，佢仲話"I will try my best, GOD will do the rest."佢話我既然而家咁糾結，不如聽下詩歌relax 下，學下禱告，求神指引下，如果神唔喜悅我同呢條友仔一齊，會比力量我去解決困境。
我好驚訝佢會咁正經叫我正視我同賤男嘅問題，一直以來我一提我地啲嘢，佢都係好不屑咁話我死蠢揀呢件喊包，覺得我係自己攞嚟抵死咁。其實我屋企人都係基督 徒，我讀書時代就識得耶穌，所以對佢嘅建議都無反感。由嗰時開始，我同AX嘅關係就多左一個層次，就係一齊分享下詩歌呀、講下耶穌咁。
AX得閒就會msn send 詩歌嚟，有日佢無啦啦send 左方大同嘅<三人遊> 比我，話，幾好聽。我聽完都唔知比咩反應佢好，不過從此就用左呢首歌做佢嘅來電鈴聲，每次一響起，都有一種好特別嘅感覺。不過我嗰時都係諗，係咪我諗多左 呢？不過啲歌詞真係好有嘢架！你地睇下:
http://www.youtube.com/watch?v=D_Q6R7jwVS4
其實我而家諗返起，係咪我潛意識都有比AX感動到而對佢開始有感覺呢？繼而令我有更大決心去飛甩賤男？定真係耶穌都睇唔過眼幫我地一把呢？到我正式飛甩賤男，AX喺fb話，上帝聽禱告^_^，唔通佢一路都有因為我而向耶穌叫救命？
飛甩賤男後，我同AX又close 左好多，不過係因為教會嘅緣故。AX帶左我返教會，除左主日崇拜仲有小組團契，有時又有啲活動，我地差唔多個個星期都見面。教會生活除左淡化左賤男對我嘅傷害，仲令我睇到AX好嘅一面，慢慢我仲唔知搞咩對佢好似有好感添。
其實開頭我唔知自己對AX係咩感覺架！係一個我好關心嘅好朋友？係教會嘅好弟兄？但如果係咁簡單，點解佢同我講佢對另一個女仔有興趣時，我會酸溜溜咁仲發脾氣？
係咁嘅，喺飛甩賤男約兩個月後，AX有日同我講佢朋友介紹左個女仔佢識，佢地互add fb，仲inbox MSG 傾左成兩個星期。佢話個女仔幾靚架，人又好nice 好啱傾，對佢幾有好感。我聽到嗰下個心竟然有啲酸味，但嗰刻我唔信自己會有呢個感覺，當然扮無嘢啦。然後AX每日打嚟就係update 同個女仔傾咩，問我應該點覆，開頭我都同佢一齊研究架，但有日Ax話佢約左個女仔第二日見面，佢買緊禮物比佢，係咁叫我幫佢打電話book 枱，我開始有啲忟了，就敷衍佢，佢竟然命令式咁話，妳好快啲幫我打去問啦下！嗰下我唔知發咩癲，好嬲咁鬧佢，"你要溝女就自己打去！唔好煩我！"仲cut 埋佢線。
AX再打嚟我無聽了。擺到明堅嬲中。我嘅反應自己都嚇親，但嗰刻我真係唔想理佢囉。
第二晚AX十點就打來，我第一句就寸佢，咁早食完？唔去睇戲飲嘢宵夜？佢話，食完咪走囉。我問，無送人返屋企？佢話，送去地鐵站囉。我再問，你又話對人有好感？咁懶點溝女呀？佢話。。。。。。
"出到嚟見到面就無感覺了。"
唔知典解我由心笑出嚟。
由嗰日開始，我就覺得AX喺我心目中又放大左啲啲。
好長呀，休息下先，之後我會講我點樣開始發現自己中左AX毒，因而展開一段長達9個月嘅初戀式暗戀歷程。仲有！成三十一歲人第一次同男仔表白呀！好瘀呀救命！
沒有留言:
張貼留言