好啦，係時候自揭瘀事了。到底我呢個當時年屆三十一嘅中女係點樣玩暗戀架呢？
事緣有日同個女仔朋友一齊上左AX屋企(新居^_^)，我就同個女仔講笑咁講起我地嘅擇偶條件，我寫左十項：
1. 要至少5呎10
2. 要識煮飯
3.唔食煙
4.唔賭錢
5.識揸車
6.用情專一
7.真心對待朋友
8.英文要好，最好外國留過學
9.要識著衫唔要波衫踢拖
10.會著西裝噴古龍水
其實真係勁玩嘢咁寫架咋！心諗點會有個咁嘅男人吖！有都一早比人嗒左啦！點知我朋友一睇，就話，容易啦！AX咪啱囉！
嗰下真係心離一離。AX嗰時行開左整自己嘢，不過都肯定聽到！我唔敢望佢有咩反應呀，因為我連自己都唔知比咩反應好，我諗我當時應該面都紅埋，好彩天黑黑 睇唔到咋，我只有哈哈大笑遮醜。後來再睇下，又係喎，除左6,7要再深究外，AX真係全部中哂！有無咁邪呀？但由嗰時開始我就愈來愈留意佢，竟然愈來愈覺 得佢其實都幾好吖。。。仲慢慢開始發姣咁掛住佢添！
其實愛上一個識左成兩年幾嘅朋友係有啲嘔心的@@唔知你地明唔明我嘅感覺，我一向覺得戀愛嘅開始係好有濛瀧美嘅，斷估都唔會係一開頭就會發現對方醜惡嘅一 面。但呢個AX，其實一直我都覺得佢好鬼乞人憎架！成日冷型咁，一係就唔出聲，一係就口出狂言，對我又粗魯，份人又固執一啲情趣都無，有時又麻麻煩煩咩都 挑剔一番，但我唔知搞咩，竟然覺得佢呢啲缺點幾可愛吖！
OMG.......其實一開始我真係接受唔到囉。。。。諗起佢我會毛管棟打冷震咁。
吖！講起AX 新居我就諗起一件事呀！其實應該上次講嘅，不過嗰時唔記得。其實我喺同賤男攤牌分手嗰晚，上左AX屋企，瞓過佢張床呀！
嘩嘩嘩。。。。。唔洗嘩住。無錯我係上左佢屋企過夜，不過AX 嗰晚飛左，根本就唔喺屋企！事緣我朋友第二日結婚，我朝早要6點去佢屋企做姊妹，AX屋企同佢屋企隔一條街，所以AX 就借間屋比我借宿一宵。好笑，開頭佢叫我瞓梳化，但佢臨走前無啦啦話，瞓梳化好陰功咁，借張床妳瞓啦。結果我回復單身嘅第一晚，就瞓左喺第二個男人張床 度。
嗰晚我根本瞓唔著！一來諗住我同賤男嘅嘢，二來感覺奇怪，我成晚都聞到AX陣味，無啦啦同佢好親近咁，感覺就好似間接同床咁囉@@
後來同個衰佬講返呀，佢話，唔明自己點解會比我瞓佢張床！就算佢父母、好兄弟上嚟借宿一宵，都係瞓梳化咋！我問，你嗰時係咪已經鍾意我啦？佢又陰陰咀笑，話，妳估下。
噫！好衰呀！
好啦，講返我係點發現自己暗戀AX先。其實感覺係一日之間爆發架，嗰日係星期日，佢要飛凌晨歐洲機，但下午竟然都去教會幫手做義工！我嗰晚搭佢機去 training，咁我喺飛機有得瞓，去做下義工有咩所謂。但佢就要直踩二十幾個鐘！正常都寧願留喺屋企瞓晏覺抖足精神今晚飛啦！所以我喺教會見到佢出 現，非常surprise ，仲真心咁欣賞佢添。
夜晚，公司upgrade 左我坐頭等，AX 咁啱service 嗰個zone，我就可以全程機見到佢啦。我睇見佢咁攰仲好專注工作，著起整齊制服流露出專業嘅微笑，嗰下真係覺得佢型架！好多女仔都話男人專注嘅時候係最 吸引嘅，我實在不能再同意更多！我除左成日留意佢外，仲偷偷地收埋佢親手摺嘅餐巾添！好電車啊！
 |
| 飛機上的電車中女 |
之後我開始嚟料了，日日瞓醒就第一時間開電腦上msn，一見到佢online 就好緊張，但又唔知講咩好喎，見佢wei我就由心笑出嚟。但為免打草驚蛇，我同佢講嘢都keep住粗粗魯魯嘅聲線。但紙係包唔住火架！好快我估佢都 feel到我唔同左，因為好似咩我都會為佢做咁，例如陪佢走遍香港九龍嘅琴行搵一支結他啦，漏夜幫佢上網搵資料啦咁，連教會朋友都開始起疑，問我係咪對 AX有超越朋友嘅感覺。我當然唔認啦，但吊詭嘅係，AX竟然有少少逃避我！
OH no...發生咩事了！
沒有留言:
張貼留言