上回講到我比AX迫左我承認鍾意佢，仲以為跟住嘅對話會好似拍戲咁，佢會話"噢！我終於等到妳了!" 點知。。。佢聽到之後竟然係好似啲三姑六婆聽到啲事非咁，話:"都話架啦！"我覺得好瘀呀！即場慘叫，呀~~~點會比你知道架！佢就擺出勝利者姿態，囂張 咁話，"一早就知啦！妳估我傻架咩 ！"我個反應都好好笑，我竟然問佢，咁點算好呀？佢就笑騎騎話，"等我消化下先，請期待事情嘅發展啦！" 然後就收左線。
收左線之後我好似撞邪咁喊左出嚟，即刻打比朋友，一路喊一路講哂成件事。朋友問我，其實我喊咩呢？聽落係好值得高興嘅事喎！我就話，我都唔知自己喊咩呀！我好驚呀！好瘀呀！嗚~~~~~
傻左。。。好彩巴士無咩人啫。。。
點知，AX所謂嘅消化下，消化左三個星期，佢唔通消化不良？我除左喺教會見到佢之外，佢無再主動打比我吹水，但我打比佢都會同我傾嘅。但我都唔敢亂咁打比 佢啦。。但其實我反而覺得輕鬆左，因為而家我都擺到明冧佢啦，仲洗咩扮嘢喎。有日我本來同佢飛但佢臨時比人改左更，我就whatsapp 佢，話，"哎呀無得同你飛，掛住你添哈哈。" 佢用iPhone 架，剔剔左，即係睇左啦！隔左好耐佢先覆，話，"我EQ高過妳，我好知自己應該點做。" 即係點呀！又扮高深！完全唔知佢咩意思囉！
雖然我好大膽咁send 呢啲示愛whatsapp ，但我見到佢係完全兩個表現！我會扮唔理佢，其實個心跳到癲左！好啦同你地分享下我當時fb寫嘅一篇notes，好浪漫架！
"有時候，很想任性地沉溺在思念的漩渦裡。
思念很毒，它會像變了種的病菌一樣，開頭只佔心中一角，卻會迅速分裂，擴散到身體每一處，讓每顆細胞都充滿你的影子。
思念，也沒有輕重之分，才剛說再見，看著你的漸漸遠去的背影，思念，就已重重的壓在心頭上。
感謝iPhone, 我手中有好幾個找你的方法，卻找不到半個找你的理由。思念，就只好在濕溼的空氣中流浪。
等到終於再見你，儲起來的思念卻像結了冰。明明很喜歡你，在你身邊明明緊張得連呼吸也凝住了，偏要裝成若無其事，毫不在乎，還故意走開一點，冷酷一點。
知否我的冷酷，正正說明了我對你的在乎？
下一次，我要讓思念提早來臨，就在你轉身離去前的一刻，可否抽一秒鐘來看看我雙眼流露出最真實的不捨？"
點知個死人賤男走去like，妖關佢鬼事。
再下班機終於同AX飛啦，但感覺超唔自然！我地喺飛機除左工作需要，完全無再講私人嘢。就算一齊坐同一道門take off landing，佢都係望住窗，若有所思咁。去到外站，佢有約我去街呀，但我地都係無講過嘢咁滯，只係講埋嗰啲"今日天氣幾好"等等嘅廢話，好無聊呀！
不過喺回程班機，有一幕令到我個心離一離，雖然只維持左一秒，但都足以令我心跳停頓。。。
嗰一秒發生喺上哂客閂哂門等推機嘅時候。正常我地坐哂喺jump seat 等做安全示範，但突然有客人按call bell ，我就去應啦，個客要報紙，咁我就行去個櫃度攞。個櫃係打橫對住AX，即係我攞緊嘅時候AX 會望到我側面。突然我feel 到佢望住我，我好似有感應咁自動拎左個頭過去。就喺嗰刻，我同佢視線碰上了，一秒，對望。佢好似發緊夢咁，一秒後先疾左一疾，即刻拎歪面，而我 呢？sorry 我完全唔記得發生咩事，只感到呼吸都要停頓了，爭啲要用飛機氧氣樽。
沒有留言:
張貼留言