上次講到同AX正式拍拖仔了！點解我要用咁多筆墨去形容我地拍拖嘅情形呢？因為真係好有初戀feel呀！其實而家呢個速食世代，真係無咩邊個拍拖係咁有耐 性嘅，睇戲都大把啦！一男一女相遇，一眼撻著，轉個頭就熱情擁吻，跟住個鏡頭就會去左張床度。。。我當然唔係咁架啦！不過好似AX啲咁「客氣」嘅就真係第 一次見喎！
上次咪話佢拍完拖嗰晚就whatsapp 我話掛住我嘅，又話想攬到我透唔到氣嘅，嘩我見到個MSG 真係面紅架！第二日佢下午就嚟左我屋企附近搵我，我住嗰個屋苑幾大嘅，好多地方行，咁我就同佢散下步啦。一路我地都係拖下手仔咋，我喺度諗，又話想攬到我 透唔到氣嘅，幾時呀？
行行下我地去左一處幾隱蔽嘅海邊，四周都無人，嗰時差不多天黑了，加上烏雲密佈咁，又大風，喺昏黃嘅街燈下，氣氛都幾嚇人。剛先停下腳步諗住欣賞下海 景，AX就即刻攬過嚟，完全殺我一個措手不及。佢攬得我好實，我全身好似陷入左佢懷抱中，而且佢個人高，面對面咁攬令到我一頭栽埋佢膊頭度，完全封閉左我 成塊面，真係透唔到氣咁滯。我真係比佢嚇一跳架！咁嘅環境，咁嘅氣氛，爭啲以為佢月圓之夜變人狼添(講笑)！等我定過神嚟，轉返塊面出嚟，我就開始享受同 佢愛的抱抱了。
佢無郁過，淨係攬住我，用同一個力度，唔知過左幾耐。我嘅右邊身體感覺到佢一下一下強而有力嘅心跳，我估同時佢都感覺到我嘅心跳。世界好似停頓左，四周狂 吼嘅風聲完全與我地無關咁，圍繞我嘅只有佢嘅體溫同氣息。一切既遠又近咁，眼前嘅AX同我相處左兩年幾，但咁親密嘅接觸真係前所未有啊！嗰一刻我突然覺得 夢幻似的唔真實，眼前呢個緊緊擁抱我嘅男人，同之前嗰個成日話我蠢又扮哂cool嘅AX，到底係咪同一個人嚟架？
因為Hold 住同一姿勢太耐，我有啲腳痺，咁我就郁左一下。AX放開左我，改為同我面對面，額頭貼額頭。嘩呢個pose 仲得了嘅，係人都知下一秒會發生咩事啦。。。。噫~~ 我真係好懷念嗰刻嘅感覺呀！我地兩個差不多零距離對望(唔知我有無鬥雞眼)，AX就用鼻尖輕掃我鼻尖，我地嘅呼吸喺狂風中混和著。喺呢啲moment 通常女主角都會選擇合上眼，一來扮下怕醜，二來其實係一種"come on baby kiss me!" 嘅Signal。我當然唔例外啦。果然，唔洗5秒我就感覺到咀唇傳來溫軟濕潤嘅感覺，雖然一切意料之內，但都難免內心砰然一動，我忍唔住睜開少少眼望下 佢，見到佢竟然都偷望緊我喎！噫好尷尬呀，我即刻合返埋眼啦。原來佢又細又薄嘅咀唇都好好錫架！嗰刻我地嘅世界只有對方，如入無人之境，我地keep 住呢個活動唔知幾耐，直到暴風雨真係殺到，我地成頭濕哂，先依依不捨咁放開對方。哇嗰刻我先覺得自己腰都痛埋，緊係啦！佢咁樣攬住我嚟錫搞到我成個人都變 成S字了，哈哈哈！
我好懷念第一次錫錫嘅情形啊，而家好少有咁浪漫激情了，不過偶然一次反而令我更有心跳加速嘅感覺呀！
 |
| 跟事發地點相距唔遠嘅另一個浪漫景點~~ |
沒有留言:
張貼留言