(十一) 在3萬5千呎高空上愛上你
上次講到我終於失而復得了。縱使呢個並唔係我1 st choice
嘅結局，但都好過之前嗰寂寞三星期吖。自從嗰個破冰電話之後，我地又好似之前咁，變返吹水閒聊sip時間之友。講起sip時間之友，我覺得自己真係當之無
愧架！過去三年我都不知收過幾多次AX電話，話聽日中午做咩咩咩，夜晚做咩咩咩，中間下午嗰段時間唔知做咩好，不如妳出嚟啦！哈哈比著第二個實睬佢都傻
啦，但我竟然從來唔介意比佢利用架喎！以前有時我要陪嗰隻賤男而唔得閒理佢，佢最後就會自己一個on
居居，有時我懷疑佢係咪得我一個朋友架。所以嗰三個星期佢對我嘅冷淡，真係令我好有失戀感覺@@不過有一日我懷疑佢忍唔住想約我架，佢突然
whatsapp 我，話，想睇戲。我問，有咩戲好睇？佢就話，等我上網望下先。但之後就無左下文了。
嘿嘿，好啦，終於比我等到佢返嚟我身邊了，我又點會放過佢吖。我地相處時我無異樣架，但我會失驚無神送啲小禮物比佢，例如一個有佢個名嘅意思嘅鎖匙扣，一
張寫有鼓勵字句嘅聖經金句咭，一本設計好特別嘅聖經...總之就唔係嗰啲咩老土幸運星之類嘅示愛禮物。我咁做目的只有一個，就係比佢知道，佢喺我心目中依
然係個我好喜歡而且好重要嘅朋友。嗰啲禮物有心意又唔沈重，絕對無迫佢落嗒嘅意圖，簡直就係冧仔嘅最高境界。
唔知係咪我啲冧功有效呢，一個月之後，我慢慢覺得AX有啲嘢了，事實上佢無做啲咩特別嘢，純粹係女人嘅直覺囉！(不過其實呢個直覺存在左好耐但忽然好
強)，有日msn大家都online 左兩個鐘，平時我地一online 就互Wei 架，但嗰日我特登唔出聲，睇住佢又on
又off，我個電腦不停傳出online alert ，我嘅心情亦都on and
off咁被牽動，點呢，好唔好主動wei佢呢？我有直覺佢都喺電腦嘅另一端猶豫著。終於，佢投降了，沒頭沒腦咁send 左句咁嘅嘢比我:"I
dropped my phone on floor but nothing happen."
我即刻狂笑，好無聊啊！擺明搵嘢講啦！跌部電話落地nothing happen 有咩咁出奇！iPhone 一向襟跌架啦！爛左爆左就話開心share 下啫！睇嚟佢為左撩我講嘢都無所不用其極。
果然，無聊吹一輪跌電話落地事件之後，佢問我，不如聽日去沙灘曬太陽吖。我話，好吖。但點知第二日黑色暴雨。。。唔通連個天都唔鍾意我？
之後我地就各自返工飛唔同地方了。過左5日，我飛完三日pattern 放假而佢就剛落機，佢應該係一開電話就打比我:"喂！聽日陪我去旺角買iPad
case!"
我啱啱喺旺角去完街返屋企途中，為左見佢，我當然唔介意連續兩日出mk啦，不過我嘅格言係，適當嘅拒絕有時係個機會。所以我照直講，又出？我啱啱喺旺角返
嚟咋！點知佢即刻話，咁算啦，bye bye!!收埋線添！oh no!!!!!佢會唔會改約第二個架！蠢左！
但到我返到屋企，佢又打嚟，話，聽日好好太陽，一齊去曬太陽啦！哈哈哈！睇嚟佢非約到我不可喎！
上次講到好緊張呀，AX逐漸落嗒中！佢一返香港就出盡方法約我去街，終於tum到我同佢去沙灘曬太陽啦。
其實我去親沙灘都一定出動性感bikini扮出水芙蓉的，嗰日我都著左件戰衣打底，外面一件沙灘吊帶裙。但係。。。我全程都著住條裙無落過水囉，因為AX都著住件及𦡞夏老威沙灘褲，我地兩個一人一張沙灘蓆，瞓左喺沙灘乾煎兩個鐘@@
原來佢話曬太陽就真係齋曬嘅。期間我地無講過嘢咁滯，佢帶左個小喇叭播音樂，我地兩個就距離半張沙灘蓆嘅身位各有各暴曬，比著第二個真係悶到瞓著。不過嗰
時我又另有一番滋味喎，同鍾意嘅人一齊躺臥喺藍天白雲之下，耳邊只有海浪聲同輕音樂，柔和嘅海風吹拂，呢啲咪係只有我同AX獨享嘅另類浪漫囉。
曬到差不多太陽落山，我地仲一齊睇左好靚嘅日落添。之後我地一齊返左教會嘅聚會，其他放工趕來嘅弟兄姊妹知道我地結伴曬完太陽，無不露出羨慕嘅神情。
 |
| 同AX曬太陽, 無聊到自拍拖鞋 |
好搞笑，雖然我地都仲係十劃未有一撇(well...應該有半撇嘅)，好多教會朋友或公司同事都形住我地係一對，見到我地是旦一個總會問另一個喺邊，後來
到我地正式一齊，個個都馬後炮咁話:"一早估到你地會一齊架啦！"
但又無人可以實質咁指出個蛛絲馬跡喺邊，就連我呢個當時人都搞唔清到底AX想點，所以當佢失驚無神嚟料嘅時候真係好驚嚇。
又要講少少神跡，都係嗰句，純粹分享，不喜勿插。大約8月2x號時我有個朋友無啦啦send 左個連鎖whatsapp 比我，又係嗰啲咩要send
比30人唔係我就孤獨終老，但如果send 左，我鍾意嘅人就會喺下個月7號愛上我。唉我最憎就係收到呢啲嘢，send 又煩，唔send
又好驚真係孤獨終老喎，但嗰刻我唔知點解好有信心呢個咒詛唔會降臨我身上，所以我同個朋友講，我唔會send
架，因為我信耶穌架！我信耶穌會幫我，下個月7號我就有男人要架啦！我朋友仲話我唔識死，攞終身幸福開玩笑。當下我緊係即刻搵大佬救命啦，快快祈左個好真
心嘅禱，我問耶穌，可唔可以比我一個神跡。
不過好快我就忘記左呢件事。咁9月7號發生左咩事呢？
嗰日我飛英國，返到酒店大約係香港時間下午一點，我開whatsapp ，見到AX 最後上線時間今天5:00am。其實做我地呢行日夜顛倒得好緊要，閒閒地都瞓到三四點。斷估AX都無咁早醒架啦，所以我放低個電話去沖涼。
沖完涼出嚟一睇，佢whatsapp 我，問，how is your flight?
唔知點解嗰下我好感動，忍唔住喊。嗰種感動係我好耐無感受過了，嗰種身處異地被掛念嘅感覺。我覆返佢諗住吹下水啦，但原來佢未醒定架，話突然醒一醒諗起我
就無聊搵下我，傾左幾句佢就話不如大家都休息一下先，瞓飽再傾。
結果我狂瞓左10個鐘，香港時間第二日凌晨我先醒到。AX 無send whatsapp
比我，但我估佢應該未瞓，就叫下佢。結果嗰晚我地whatsapp
傾左5個鐘，由無聊吹水到講事講非到聖經分享到最後一齊攤喺床度，佢就望住窗外剛發白嘅天空，我就望住英國剛日落嘅暮色，比較邊個嘅天空比較靚。
總之兩個都唔捨得offline 咁。
 |
| 我就係望住呢個即將日落嘅天空, 同AX傾左5個鐘。 |
然後第二日就輪到佢飛澳洲。其間我地日日都傾幾個鐘whatsapp。我同佢係同一日返香港架，不過我就早佢幾個鐘落機。到佢落機時我都沖哂涼準備瞓了。
突然有個同佢一齊飛嘅同事打比我，笑哂咁話: "有人落機收唔到MSG 就話好失落喎~~又話唔知好唔好打比人，驚人落機太攰瞓左喎~~"
我扮哂嘢，話，邊個呀？然後我聽到個同事想將個電話塞比AX，但佢唔肯聽，而且擾嚷完一輪仲收埋線添！
過左半個鐘AX就打比我，聲線有明顯古怪，尷尷尬尬咁，講左幾句就急急腳收線。我記得嗰日係911事件10週年，佢話電視會有特備節目，咁我就唔瞓住睇埋先。
睇完我真係要瞓了。我攰到想暈咁滯，撻落床即刻瞓著嗰隻。點知AX 又whatsapp 我，無厘頭咁話我知，沖完涼。我都唔知點回應好，一來我太攰了，二來我心諗，點解沖個涼都要向我報告呢？
就喺呢一刻，一個驚天動地嘅MSG 出現了。
"Do you still like me."
將原本昏睡狀態嘅我嚇到成個彈起。嗰下完完全全醒哂，但就咩都諗唔到，淨係識流眼淚，到底我喊咩呢？我都唔知，只知心情異常激動，拎住電話嘅手完全震哂，我全身得隻右手中指好冷靜，唔洗幾秒就打左一隻字，簡單直接," Still."
然後，AX就話，佢現階段係想搵結婚對象、終生伴侶，而唔係搵個女朋友拍下拖。佢好清楚大家都有感覺，但到底我地係咪可以一生一世呢？佢唔想搞錯，到頭來
互相傷害，所以佢猶豫左幾個月。但到前幾日佢突然發現對我感覺深左，唔忍心我自己一個等落去，咁對我好唔公平，所以決定同我表明一切，大家好好商量一下。
Whatsapp 另一邊嘅我表現得好冷靜，答: " That's right. Let's pray and see what happen
next."
但事實上我喊到阿媽都唔認得。雖然我地未正式一齊，但至少我肯定，我一直喜歡一直等待緊嘅人都同樣喜歡我！全球幾十億人，機會率仲低過中六合彩呀！嗰下我
除左祈禱感恩，我唔知可以點樣解釋呢個幸運嘅來臨。
好啦，你地可能會仲記得9月7號嘅事。到底呢一日發生左咩事呢？我都係後來先知架！AX有個xanga ，我得閒就會上去望下，見到佢有一篇: "今日突然成日諗住一個人。到底係我亂諗，定我對呢個人有感覺呢？"
日期就正正係9月7號呀！
好，瞓覺先，嚟緊就會講AX點樣下定決心要同我一齊啦，拍左拖10日就求婚添！
